Fəaliyyəti süzgəcdən keçirin və ixrac edin
Vaxt aralığı seçin, əməliyyatları növ və nəticəyə görə süzgəcdən keçirin, resursu və ya istifadəçini axtarın, təfərrüatlara baxın, səhifəni CSV kimi ixrac edin.
Activity Log səhifəsindən lazım olan əməliyyatları tapmaq, uğursuz əməliyyatın səbəbini oxumaq və onların bir səhifəsini CSV faylı kimi saxlamaq üçün istifadə edin.
Başlamazdan əvvəl
Layihədə (project) və ya onun abunəliyində (subscription) Audit Log üzrə Read girişi olan istənilən rol lazımdır, məsələn, Owner, Contributor və ya Reader. Billing Operator rolunda bu giriş yoxdur.
Vaxt aralığını seçin
Konsolda Activity log bölməsinə keçin.
Operation volume başlığının yanında 1h, 24h, 7d və ya 30d seçin. Standart olaraq 30d seçilir.
Diaqram aralığın əməliyyatlarını nəticəyə görə göstərir: 1h və 24h üçün hər saata bir sütun, 7d və 30d üçün isə hər günə bir sütun. Başlığın yanında bütün aralıq üzrə saylar göstərilir: bütün hadisələr, uğurlu, uğursuz və gözləyən əməliyyatlar.
Birinci səhifə hər 30 saniyədən bir təzələnir, buna görə yeni əməliyyatlar siz baxarkən görünür.
Süzgəc və axtarış
Bir əməliyyat növünü (action) göstərmək üçün onu All actions siyahısında seçin.
Bir nəticəni göstərmək üçün Any result siyahısında Success, Failure və ya Pending seçin.
Axtarmaq üçün axtarış qutusuna yazın. Yazmağı dayandıranda siyahı yenilənir.
Bütün süzgəcləri silmək və son 30 günə qayıtmaq üçün Clear filters düyməsini seçin.
| İdarəetmə elementi | Necə işləyir |
|---|---|
| All actions | Cari səhifədəki əməliyyatların növlərini ID şəklində sadalayır, məsələn, compute.instance.create. Süzgəcin özü isə bütün aralığa tətbiq olunur. |
| Any result | Siyahını daraldır. Diaqram və saylar isə yenə bütün nəticələri göstərir ki, müqayisə edə biləsiniz. |
| Axtarış | Əməliyyat növünün ID-sinin, resursun tipinin, ID-sinin və ya adının, yaxud icraçının (actor) ID-sinin, adının və ya e-poçt ünvanının bir hissəsinə uyğun gəlir. Böyük və kiçik hərflər fərq etmir. |
Əməliyyatı oxuyun
Hər sətirdə bunlar göstərilir:
- əməliyyatın başa çatdığı vaxt, icra olunarkən isə son yenilənmə vaxtı, hesabınızın saat qurşağında;
- cümlə şəklində əməliyyat növü, məsələn, “Snapshot created”. Uğursuz əməliyyatda onun altında səbəb və xəta kodu göstərilir;
- resurs. Resursun səhifəsi varsa, həmin səhifəni açmaq üçün resursu seçin;
- icraçı: istifadəçinin adı; siçan göstəricisini onun üzərinə gətirdikdə e-poçt ünvanı da görünür. Təşkilatınızın istifadəçisi olmayan icraçının ID-si göstərilir, platformanın öz əməliyyatlarında isə system göstərilir;
- nəticə.
Daha çoxunu görmək üçün sətri seçin. Sətir genişlənir və əməliyyat ID-sini, əməliyyat növünün ID-sini, xidməti, əməliyyatın nə qədər əvvəl baş verdiyini və əməliyyatın JSON formatında tam qeydini göstərir. Qeyddə sorğunun gəldiyi IP ünvanı da var.
Siyahı ən yenidən ən köhnəyə doğru sıralanır, hər səhifədə 50 əməliyyat olur. Səhifələr arasında keçmək üçün Previous və Next düymələrindən istifadə edin.
Səhifəni ixrac edin
İstədiyiniz aralığı, süzgəcləri və səhifəni təyin edin.
Export page (CSV) düyməsini seçin.
Brauzer ekrandakı səhifənin əməliyyatlarını (50-yə qədər) adında abunəlik, aralıq və səhifə göstərilən CSV faylı kimi endirir, məsələn, activity-<subscription-id>-30d-p1.csv. <subscription-id> abunəliyinizin ID-sidir. Daha çox əməliyyatı ixrac etmək üçün hər səhifəni ayrıca ixrac edin.
| Sütun | Məzmun |
|---|---|
timestamp | Siyahıda göstərilən vaxt, UTC üzrə, ISO 8601 formatında. |
action | Əməliyyat növünün ID-si. |
service | Xidmət, məsələn, Compute və ya Storage. |
resource | Resursun adı və ya ID-si. |
actor, actorEmail | Siyahıda göstərildiyi kimi icraçı və istifadəçinin e-poçt ünvanı. |
result | Success, Failure və ya Pending. |
operationId | Əməliyyat ID-si. |
errorCode, errorMessage | Uğursuz əməliyyat üçün xətanın kodu və səbəbi. |
Fəaliyyəti REST API vasitəsilə, öz vaxt aralığınızla oxumaq üçün GET/scopes/{scopeId}/activity/activity-events səhifəsinə baxın.
Nəticə
Siyahı seçdiyiniz aralığın və süzgəclərin əməliyyatlarını göstərir, fayl isə ixrac etdiyiniz səhifəni ehtiva edir.
Nasazlığın həlli
| Mesaj | Səbəb | Həll |
|---|---|---|
| No matching activity | Aralıqdakı heç bir əməliyyat süzgəclərə uyğun gəlmir. | Daha uzun aralıq seçin və ya Clear filters düyməsini seçin. |
| Couldn’t load activity | Fəaliyyət axını cavab vermədi. | Retry düyməsini seçin. |
Gözlədiyiniz əməliyyat aralıqdan köhnədirsə, başqa layihədə icra olunubsa və ya əməliyyat kimi icra olunmursa, siyahıda görünmür. Activity Log nədir? səhifəsinə baxın.